Қазіргі таңда өскелең ұрпаққа өлкеміздің тарихымен, ескерткіштерімен, ақын- жазушыларымен таныстыруда кітапхананың алатын орны еркеше. Осы орайда Балалар және жасөспірімдер кітапханасында Қазақстан Жазушылар Одағының мүшесі, республикалық «Абай» журналының бас редакторы, бірнеше республикалық жыр мүшәйраларының жүлдегері, ақын Мұратбек Оспановтың 50 жылдық мерейтойына орай «Ақын – елдің арқауы» кездесу кеші болып өтті. Кешке «Радиотехника және байланыс» колледжінің 1 курс студенттері қатысты.

Кездесу кештің мақсаты: жергілікті ақын М. Оспановтың өмірбаяны мен шығармашылығына тоқталып, автордың шығарған жыр жинақтарын оқушыларға таныстыру.

Шара барысында кітапханашылар ақынның өмірі мен еңбек жолын таныстыра отырып, сөз кезегін ақынға берді. М.Оспановтың шығармашылығына арналған слайд көрсетілді. «Радиотехника және байланыс» колледжінің студенттері де ақынға қызықты сұрақтар қойып, өлеңдерін оқыды. Әсіресе Мамырбекова Аяулымның ақынға арнаған арнауы өте жақсы шықты. Кеш барысында ақын «Таңдайдағы тамшылар», «Жырұйық», «Сүмбіле» атты кейінгі шыққан кітаптарынан өзінің өлеңдерін оқыды. Шара соңында кітапханашылар ақынды мерейтойымен құттықтап, сыйлық табыстады.

Мақсаты: Өлкеміздегі ақын – жазушыларымыздың өрнегі мол жырларын жас ұрпаққа насихаттап, еліне, жеріне деген сүйіспеншіліктерін арттыру.

Aбайдай, Мұхтардай, Шәкәрімдей даналарымыздың құнарлы топырағында дүниеге келген ақын Мұратбек Оспановтың 50 жылдық мерейтойына арналған «Ақын - елдің ардағы» атты кездесу кеші өткізілді.

Кешке Қазақстан жазушылар одағының мүшесі, филология ғылымының кандидаты, ақын Мұрат Сұлтанбеков, драматург Жұмабек Қамбаров, «Дәулет» коммуналдық кәсіпорынының директоры, ақынның жанашыры, демеушісі Шаған Жұмақсанов, республикалық «Абай» журналының тілшілері және ақынның алғашқы ұстазы, «Абай» журналының жауапты хатшысы Айтқаным Ахметбекова, республикалық «Жас қазақ үні» газетінің Семей өңірлік меншікті тілшісі Орымбек Сарсенбин, студенттік өмірін бірге кешкен ақынның досы Бекен Нұрахметов, СМПИ даярлық тобының тыңдаушылары Қытай, Маңғолия елдерінен келген қандастарымыз және Радиотехника және байланыс колледжі студенттері қатысты.

Қазақстан Жазушылар және Журналистер Одағының мүшесі, Республикалық «Абай» журналының бас редакторы, бірнеше республикалық мүшәйраларының жүлдегері, ҚР «Мәдениет қайраткері», «Абай» ауданының құрметті азаматы, ақын Мұратбек Оспановтың өмірін, шығармашылығы мен еңбек жолын кітапхана қызметкері толық баяндап берді. Ақынның шығармашылығы негізінен азаматтық лирикадан тұрады. Бұл дегеніміз - тәуелсіз мемлекетіміздің түйткіл мәселелелерін қозғайды. 2003 жылы республикалық «Абай» журналына бас редактор болған алғашқы күннен бастап журналдың ертеден ұстанған бағытымен қоса, қоғамдағы саяси – әлеуметтік тақырыптарға ерекше мән беріп, жыл сайынғы ел Президентінің жолдауын қолдай отырып, еліміздің саяси беталысын саралайтын материалдарды үнемі жариялау үстінде. 2005 жылы Ел тәуелсіздігінің бір мүшел болған күніне арналған «Тәңір сыйы» атты дастаны жарық көрген. Осы дастанға байланысты Елбасы алғысын жеткізген арнайы хат алған.

М.Оспанов поэзиямызға көлденең кеп қосылған көк аттылы емес, «Ар» атты арғымақ үстіндегі егеменді егеулі қаламын ұстаған, ішкі серт, уәдемен, үлкен тілеумен, жарқын үмітпен келген ақын. Кеш барысында ақын өзінің бірнеше өлеңдерін оқып, жыр құмар қауымға өзгеше әсер, өзіндік ләззәт шуағын сыйлады Қазіргі таңда ақын Мұратбек Оспанов ащы маңдай мен терімен піскен шымыр шығармаларының тәтті жемісін жинап келеді. Кешке келген қонақтарға сөз беріліп, өзіндік қолтаңбасымен, қазақы сөз бояуымен, шеберлігімен ерекшеленетін ақынға ыстық лебіздерін білдірді.

Кітапхана директоры А.Ә. Шаймарданова ақынды құттықтап, кітапхана бөлімшелерінің оқырмандарымен кездесуге шақырды.

СМПИ 2 курс студенті Мақаев Жасұлан ақынға өз арнауын тарту етсе, қандастарымыз Әуетай, Рахатбек, Серік Семей жеріне, Абай ақынға арнаған жүрекжарды өлеңдерін оқи отырып, көкейлеріндегі сұрақтарын қойып, мазмұнды да мағыналы жауаптарын алды.

Кеште кітапханаға келіп түскен Мемлекеттік «Мәдени мұра» аясында Ел Президенті Н.Ә.Назарбаевтың бастамасымен, Шығыс Қазақстан облыстық әкімдігінің қолдауымен шыққан Шығыс өңірінің ақын -жазушыларының жаңа әдебиеттерімен таныстырылып, слайд көрсетілді.