Өлкетану оқулары 2012 жылы аталып өтілетін атаулы күнтізбеге арналды. 2012 жыл өлкеміз бойынша тарихи оқиғаларға өте бай: Семей қаласына қала статусы берілгеніне 230 жыл, Шығыс Қазақстан облысының орталығы Семей қаласы болып құрылғанына 80 жыл т.б.
Өлкетану - кітапхана жұмысының негізгі бағыттарының бірі. Кітапхананың міндеті – ұлтымыздың рухани өркениеті, тарихы, мәдениеті, салт-дәстүрлері туралы өлкетану материалдарын насихаттау және тарату.
Өлкетану оқуларының мақсаты: кітапхана жұмысында өлкетану тақырыбындағы көпшілік мәдени шараларды өткізуде жаңа ақпараттық технологияларды қолдану, жаңашылдық енгізуді үйрену, өлкетану ақпаратын жинақтау, оқырмандарға таныстыру, жастарымыздың бойында туған өлкеміздің тарихына қызығушылық туғызып, отансүйгіштік сезімдерін қалыптастыру, кіші отанымызға деген сүйіспеншілік туғызу.
Өлкетану оқуларының қатысушылары Орталықтандырылған кітапхана жүйесінің кітапханашылары, мектеп кітапханашылары, қаламыздағы оқу орындарының студенттері болды.
Бүгінгі уақытта кітапханалар жаң ақпараттық технологияларды қызмет барысында батыл қолдануда. Көптеген кітапханалар «Электронды кітапхана» құруға ұмтылып жатқанда, біз де жаңа кітапханалық жоба «Жанды кітапқа» назар аудардық. Өмірі қызықты, өлке тарихын жақсы білетін адамдармен кездесу, яғни «Жанды кітап - адам» түрінде бастауды жөн көрдік. «Жанды кітап - адам» жобасының негізгі кейіпкері ұстаз, филолог, еңбек ардагері, қызықты әңгімеші, өмір жолы қызықты оқиғаларға толы ұлағатты адамдардың бірі Н.П.Минакова болды. Кейіпкер биылғы жылы 90 жылдық мерейтойын тойлайтын, есімі берілген қаламыздағы көне оқу орындарының бірі Р.С.Байсеитов атындағы қаржы-экономикалық колледжінің тарихы туралы әңгімелеп берді. Н.П.Минакова ұзақ жылдар Совет Одағының Батыры П.Ф.Железняковтың әйелімен хат жазысып тұрған. Басқа да қызғылықты жайттар айтылды.
Бұдан әрі Семей тарихы жайлы әңгімеленіп, қатысушылар қаламыздың 250 жылдығына арналған уникальды ретрофильм көріп тамашалады.
Библиограф М.Ахметкалиева биылғы жылы 115 жыл толып отырған қазақ жазушысы М.О.Әуезовтің туған күніне байланысты баяндама жасады, «Әуезов мұражайлары» атты виртуалды көрмемен таныстырды. Сонымен қатар Л.Соболев, О.Сүлейменов сияқты көрнекті жазушылардың естеліктері, М.Әуезовтің дауысы жазылған өте құнды кадрлар, мұрағат қорынан алынған аудио-видео материалдар қолданылды.
Өлкетану секторының кітапханашысы Ж.Әбілмәжінова жергілікті жазушы Әди Шәріповтің туғанына 100 жыл толуына орай «Әдебиетіміздің алтын қазынасы» атты слайд-презентация көмегімен баяндама жасады. Жазушының шығармасының желісімен түсірілген «Орман хикаясы» фильмінен үзінді көрсетілді.
Ақпараттық-библиографиялық бөлімнің қызметкері қаламыздығы тарихи-сәулеттік ескерткіштер жайында әңгімелеп, «Семей ескерткіштері» атты виртуалды викторина ұсынды.
«Барлығы туған жерден басталады...» - дамыту және әдістеме бөлімінің әдіскері Т.Д.Сухорукова өлке тарихы туралы қызықты ақпараты осылай аталды.
Мәдени шарда қатысушылар назарына ұсынылған ақпарат, деректердің барлығы өте қызықты, жан-жақты, тыңғылықты дайындалған материалдардан жинақталды.
Ақпараттық-библиографиялық бөлім қызметкерлері кітапханалық-библиографиялық өлкетану өнімдерін қатысушылар назарына ұсынды.
Аймақтық кітапханалық өлкетанудың негізгі мәселелерінің бірі – жаңа ақпараттық технологиялар негізінде оқырмандарға қызмет көрсетуді ұйымдастыру, өлкетану құжаттарын жинақтау, жергілікті өлкетану мәліметтер базасы мен бірлескен электрондық ресурстарды құру. Ал өлкетану ақпараттарын – пайдаланушыларға арналған қызықты ақпараттық өнімдерді ұсынып, оның көлемі үнемі өсіп отыруы қажет. Осы орайда жұмыстар жүргізіле бермек.
«Халқымыздың рухани, тарихи, әдеби мұраларын сақтап, халыққа жеткізетін кітапханалардың бары қандай жақсы», - шараға қатысқан қонақтардың бірауыздан түйіндеген ойлары осындай. |