Ұлыстың Ұлы күні Наурыз мерекесіне орай «Наурызым – мерекем, Наурызым – берекем» атты әдеби сазды кеш «Шәкәрім атындағы облыстық дарынды балаларға арналған үш тілде оқытатын мамандандырылған» мектептің 2 «Ә» сынып оқушылары, сынып жетекшісі Қ.Қ.Шахманованың қатысуымен өткізілді.

Шара мақсаты: Наурыз мейрамы туралы түсінік беру. Мерекелік көңілдерін көтеру, елге деген сүйіспеншілікпен бірге, салт-дәстүрді құрметтеуге тәрбиелеу.

Кеш басында кітапханашылар әдемі музыка әуенімен қонақтарды қарсы алды. Қысқаша Наурыздың шығу тарихымен таныстырып өткеннен кейін, оқушылар хормен «Көктем» атты әнді айта отырып, ұлттық киімдермен ортаға шықты. Оқушылар кеште өздерінің ала келген Наурыз туралы тақпақтарын оқып, Ақерке «Сәулем-ай», Әлихан «Көк тудың желбірегені» әндерін орындап берді. Сынып оқушылары «Балдәурен» және «Қара жорға» билерін нақышына келтіре билеп, көрермендерге тарту етті.

Кештің жалғасын кітапханашылар «Наурыз құтты болсын!» атты слайд-шоумен жалғастырды. «Ел дәстүрін сыйлайық» атты бөлімінде қазақтың тұсау кесер салты көрсетіліп, «Аударыспақ», «Теңге алу», «Арқан тарту» ойындары ойналды. Шар ішіне жасырылған сұрақтарға балалар жауап беріп, сыйлықтар таратылды.

Шара барысында Қыдыр ата бейнесінде келген кітапхананың тұрақты оқырманы Б.Бекишев оқушыларға ақ батасын берді.

Шара соңында «Наурыз мерекесі» атты кітап көрмесіне библиографиялық шолу жасалып, ата-аналар даярлаған Наурыз көжеден дәм татты.

Наурыз — өте көнеден келе жатқан мейрам. Күні бүгінге дейін жер шарындағы көптеген халықтардың дәстүрлі мейрамына айналып отырған бұл мерекенің қашаннан бері тойланып келе жатқанын дөп басып айту қиын.

Шығыс халықтарына ортақ мейрам – Наурыз. Оның ішінде қазақ ұлтының ежелгі мейрамы. Қазақ Жаңа жыл күнінде «Ұлыс оң болсын, ақ мол болсын, қайда барса жол болсын!» деп бір-бірімен көріседі. Бұл мереке халқымыздың ұлттық салт-дәстүрлері, жоралғылары жарқырайтын күні. «Наурыз» мерекесінің салт-дәстүрлерінен ұлтымыздың мінез-құлқы, ақыл-ойы, дүниеге көзқарасы көрінеді.

Бүгінгі күні Наурызды мерекелеуге кең көлемде маңыз беріледі. БҰҰ Бас ассамблеясы 21 наурызды бүкіл адамзат мұрасының бөлшегі болып, адамдар теңдігінің, бостандығы мен демократиясының символын айшықтайтын Халықаралық Наурыз күні деп таныды. Қазақстандықтар үшін Наурыз адамдардың рухани тазаруына сеп болатын, қоғамда бейбітшілік пен келісімді нығайтатын қайта түлеу мен жаңару мейрамының нышаны болу қажет. Наурыз еліміздегі қазақ ұлтына және өзге де 130 этнос өкілдеріне бірдей қымбат.

Өскелең ұрпақты халықтық дәстүрге баулу, Наурыз тарихымен таныстыру, ұлағатты сөздердің мәніне қарай адамгершілікке тәрбиелеу, ұлттық салт-дәстүрді дәріптеу, шығармашылық қабілеттерін дамыту мақсатында мектеп оқушылары мен колледж және жоғары оқу орындарының студенттері үшін Орталықтандырылған кітапхана жүйесіне қарасты кітапхана-бөлімшелерінде түрлі мәдени-көпшілік шаралар ұйымдастырылып, өткізілуде.

Қалалық орталық кітапханада халқымыздың ежелден желісі үзілмей келе жатқан көне салт-дәстүрлері мен әдет – ғұрыптары, рухани-мәдени және адамгершілік дүниеміздегі қымбат қазыналарымызды өскелең ұрпаққа насихаттау мақсатында «Радуга» шығармашылық ұйымы аясында «Наурыз – қазақтың төл мерекесі» атты әдеби-сазды кеш ұйымдастырылды.

Кешке ҚР оқу - ағарту ісінің озаты, ҚР журналистер одағының мүшесі, шежіреші, этнограф, қаламгер Молдабек Жанболатов, «Ахау-Семей» Қазақ әлеуметтік мәдени орталығының мүшелері және Радиотехника және байланыс колледжінің студенттері қатысты.

Кеш барысында кітапхана қызметкері Наурыз мейрамының өте көнеден келе жатқаны туралы тарихи деректерге сүйене отырып, 940-1020 жылдары өмір сүрген ғұламалардың Наурыз мейрамының тарихын және күн мен түннің теңескен уақытынан басталатын «Мәліки жыл есептеу» деген атпен ежелгі халықтардың уақытты есептеу жүйесін енгізіп, күнтізбе жасағаны туралы қызықты ақпаратпен бірге «Ұлыстың ұлы күні» жайында аңыздарға тоқталды.

Сонымен қатар халық кемеңгерлерінің айтқан Наурыздың қасиеті туралы, ұрпақтан – ұрпаққа жеткен салт – дәстүр үлгісін және қазіргі кезде Қыдыр, Қызыр, Қадыр аталардың кім екенідігі туралы кеңінен ақпарат берілді.

«Наурызнама» кітабының авторы Молдабек Жанболатов сөз кезегінде Наурызды тойлаудың бес ерекшелігіне және әркім өз білгенімен жасап жүрген наурыз – көженің ұлттық мәніне, «жеті» санының қазақ үшін қастерлі екендігіне айрықша тоқталды және оқырмандардың Наурыз тарихына байланысты сұрақтарына ұтымды жауап берді.

Наурыз мерекесінде көрініс табатын салт-дәстүрлерді өскелең ұрпаққа насихаттау мақсатында «Ахау-Семей» Қазақ әлеуметтік мәдени орталығының мүшелері Наурыз мерекесімен құттықтап, мерекелік шашу шашты. Қазақтың салт-дәстүрлеріне тоқтала келе, баланы бесікке салу рәсімін көрсетіп, бесік жырын нақышына келтіре орындап берді.

Халқымыздың рухани тарихын тереңнен тартып сезінуге ұмтылдыра отырып оқырмандар арасында мақал-мәтел сайысы ұйымдастырылып, белсенді қатысқандарға ынталандыру сыйлықтары табыс етілді. Жиналған қауым мерекелік дастарханға қойылған ұлттық тағамдардан дәм татып, М. Жанболатов халық баталырының түрлерін тоқтала келе, жас ұрпаққа наурыз батасын берді.

Шара соңында «Айналаны нұрландырып Әз Наурыз келді!» атты кітап көрмесіне қойылған әдебиеттермен таныстырылды.

Шаралардың мақсаты: ана құдіретін, оның өмірдегі алатын орнын дәріптей отырып, аналардың өлшеусіз еңбегін бағалай білуге үйрету және бүгінгі таңда еліміздегі аналардың қоғамдағы орнын ашып көрсету, отбасылық құндылықтарды қалыптастыру.

Қалалық орталық кітапханасында «Мерей» клубы аясында «Ана деген – алтын қазық, алтын бақ» атты әдеби-сазды кеш өткізілді. Мерекелік шараға Д.К.Пшембаеваның жетекшілігімен Радиотехника және байланыс колледжінің 2 курс және С.Т.Альдибекованың жетекшілігімен Қазақ гуманитарлық-инновациялық заң университетінің өнерлі жастары арасында ұйымдастырылған «Ақ ниет» атты қайырымдылық қорының белсенді студенттері қатысты.

Шара барысында кітапхана қызметкері елдік пен ұрпақ қамын ту етіп көтере білген аналарымыздың ерлігін, кәсіп пен мамандықтың түр-түрін меңгеріп, оның ішінде техникалық кәсіпті игергендігін және қазақ спортының дамуына қосқан өлшеусіз еңбектері туралы кеңінен ақпарат берді.

Сонымен қатар М.Әуезовтің «Абай жолындағы» Зере, Ұлжан, Ғ.Мүсреповтің «Ананың анасы», «Өлімді жеңген ана», «Ашынған ана», «Ананың арашасы», соғыс жылдарында жазылған «Ер ана», «Ақлима», «Ұлпан», Шыңғыс Айтматовтың «Ана – Жер – Ана» сияқты аяулы аналардың бойындағы сарқылмас кұдіретті күшті керемет шеберлікті жырлайтын жазушыларымыздың тарихын тауыса алмайтын көркем туындыларына тоқталып шолу жасалды.

Шара барысында көктем мерекесінің тарихы туралы ақпарат беріліп, «Гүлдердің айтар ойы бар» атты видео фильм көрсетіліп, гүл туралы қызықты аңыз айтылды.

«Ақ ниет» атты қайырымдылық қоры оқырман қауымға мерекелік ән-шашуларын тарту етсе, колледж студенттері «Ана» туралы өлеңдерін тебірене оқып берді. Халық даналығында ананы ардақтайтын асыл сөз маржандары арқылы оқырмандар арасында мақал-мәтел сайыстары ұйымдастырылып, белсенді қатысқандарға ынталандыру сыйлықтары табыс етілді және Ш. Қалдаяқовтың «Ана туралы жыр» атты әнін хормен айтып, аналарына деген сағыныштары арта түсті.

Шара соңында «Ана - от анасы, қоғам берекесі» атты кітап көрмесіне шолу жасалды.

№6 кітапхана-бөлімшесінің оқу залында №8 мектеп-кешенінің 4-5 сынып оқушыларымен «Ана өмірдің шуағы» атты поэзия кеші өткізілді. Шараға М.Төлебаев атындағы Музыкалық училищесінің 2 курс студентері мен «Шанырақ күмбездерінің астында» клуб мүшелері қатысты.

Тіршіліктің гүлі, отбасының берекесі, бүкіл адамзаттың тәрбиешісі аналардың құрметіне арнап ұйымдастырылғын шара барысын кітапхана қызметкері дүниедегі жақсылық атаулының барлығы күннің нұрынан, ананың мейірімінен таралғанын айта отырып, шараны жүргізіп отырды.

Сонымен қатар шарада асыл аналарымыз туралы тамаша сөздер, мақал-мәтелдер айтылып, М.Төлебаев атындағы Музыкалық училищесінің студентері «Ана арманы» атты көрініс көрсетті. Мағауянов Архат «Ана туралы жыр», «Асыл әже» әндерімен шараны көркемдеп отырды. «Шанырақ күмбездерінің астында» клуб мүшелері аналарға арнап әдеби-музыкалық монтаж оқыды.

Шараға арнап ұйымдастырылған «Әйел-өмір тірегі» атты кітап көрмесіне библиографиялық шолу жасалды. Аталған көрмеде әр кезеңдегі арулар бейнесін сомдайтын материалдар орын алды. Яғни, ұлттық эпос ханшайымдарынан бүгінгі заманауи педагог, ғалым, әртіс, биші, әнші және спортшы жандарға дейін қамтылған.

Балалалар және жасөспірімдер кітапханасында «Ана біздің күніміз!» атты көрме-вернисаждың тұсаукесері кітапхана оқырмандарының қатысуымен өткізілді.

Кітапхана қорында сақталған әдебиеттер мен мерзімді басылымдар қойылған көрме үш бөлімнен тұрды:

1. «Ұлы даланың даңқты қыздары» атты бірінші бөлімде ел басына қатер төнсе, ерлермен бірге атқа қонып, өз халқының қамын ойлаған, тарихта болған ұлы аналар туралы әйгілі сақ-массагет патшайымы Томирис-Тұмар ханым, даналықтың символына айналған Домалақ ана, Қаһарман қазақ қыздары отты жылдарда ер-азаматпен бірге қолына қару алып, майдан шебіне аттанған Мәншүк Маметова, Әлия Молдағұлованың ерліктері туралы иллюстрацияланған әдебиеттер ұсынылды.

2. «Қазақстанның өнер жұлдыздары» тақырыбындағы екінші бөлімге Кеңес Одағының халық әртісі, қазақ халқының бұлбұлы Күләш Байсейітова, ҚР Халық қаһарманы Роза Бағланова, халық әртісі Әмина Өмірзақова, Меруерт Өтекешова, Роза Рымбаева және қазақ сахнасының саңлағы Бекен Римова тағы да көптеген аты танымал аналар туралы кітаптар қойылды.

3. «Әдебиет пен өнердегі аналар бейнесі» атты үшінші бөлімде оқырмандардың назарына ақын-жазушылардың ана образын сомдаған шығармалары мен әйгілі суретшілер мен мүсіншілердің туындылары бейнеленген суреттер ұсынылды.

Көрмемен танысқан оқырман қауым көрнекті қайраткерлердің, ардақты аналардың еңбектерімен танысып, қызығушылықтарын білдірді.

Цемент кентіндегі кітапхана-бөлімшесі қызметкерлерінің ұйымдастыруымен №11 мектеп кітапханасында 7 сынып оқушыларымен «Анасы бар адамдар қартаймайды!» атты сазды кеш өткізілді.

Дүниеде ананың мейіріміне, аялы алақанына не жетеді?! Дүниеге келіп көзіңді ашып көретінің – Ана. Қанаттыға қақтырмай, тұмсықтыға шоқыттырмай бауырына басып, біз үшін шырылдайтын да – Ана. Ана – біз үшін пана, дара, дана тұлға. Аналарымыздың осындай қасиеттерін құрметтеу мақсатында өткізілген шарада оқушылар аналарға арнап өлеңдер оқып, ән салып берді. Шара барысында кітапханашы оқушыларға сайыс түрінде ойындар жүргізді. Олар: шаштараз конкурсы, үй бике конкурсы, тәрбиешілер конкурсы, гүлдер туралы жұмбақтар жасырылып, конкурс жүргізілді.

Мирный кентіндегі кітапхана-бөлімшесінде «Жас толқын» клубының аясында №26 орта мектептің 7-8 сынып оқушыларының қатысуымен «Сіз, жоғары мәртебелім-Ана» атты әдеби-сазды кеш өткізілді.

Кешке мүмкіндігі шектеулі балалар аналарымен шақырылып, Орталық мәдениет және демалыс саябағы қызметкерлерінің қатысуымен өтті.

Кеш басында кітапханашы Ана барлық өмірдің бастауы екендігін айтып өтті. Ол адамды өмірге әкеледі, оны тәрбиелейді, өсіреді. Адам бойындағы барлық асыл қасиет күннің нұрынан, ананың ақ сүтінен дариды. Баласы үшін Ана ештеңеден тайынбайды. Ананың махаббатынан асқан қасиетті ештеңе жоқ. Ол баласын бар жүрегімен сүйеді. Ұлылық күш ананың махаббатында! Әйелге тағайынды ақиқат ол-ана болу.

Ананың нәзік үні, жұмсақ аялы алақаны, жан жылуымен аялауы бізді әлдилеп жұбатады. Ана жайында жазылған кітаптар аз емес екендігіне тоқтала кетіп, кітапханашы «Ана өмірдің шуағы» атты кітап көрмесіне библиографиялық шолу жасады.

Шара барысында Н.Н.Мурзаханованың жетекшілігімен Тері-комбинаты мәдениет үйінің көркемөнерпаздары «Ертіс толқындары» ансамблінің концерттік бағдарламасы қатысушылар назарларына ұсынылды. Тұрсынғалиева Нұрғисаның орындауындағы «Анашым» әні, Манапова Гулімнің мың бұралған «Қазақ биі» көпшілік көңілінен шықты. Кеш соңында 1 ықшамаудан тұрғындары мерекелік шараның аналарға көтеріңкі-көңіл күй сыйлағанын жеткізіп, ризашылықтарын білдірді.

Шүлбі кентіндегі кітапхана-бөлімшесінде «Аналарға арнаймыз» кеш атты Арнайы әлеуметтік орталықтағы тәрбиеленушілердің аналарының қатысуымен өткізілді.

Шара басында кітапханашы қатысушыларға 8 наурыз – Халықаралық әйелдер мейрамының шығу тарихы жайында айта келіп, олардың назарын аналар образын суреттейтін көркем әдебиет, бейнелеу өнері мен музыкалық шығармалар қойылған кітап көрмесіне аударды.

Кеш қонақтарын Халықаралық әйелдер күнімен құттықтаған Арнайы әлеуметтік орталық қызметкері Амерханова Ж.Т кешті жалғастыра түсті. Соңынан аналарға арналып, әдеби-сазды және сайыс бағдарламалары ұсынылды. Шара слайд-шоу шеруіне ұласып, сыйлақтар тапсырумен аяқталды.

Кешті қорытындылай келе, әлеуметтік қызметкер Амерханова Ж.Т. және кеш қонағы ретінде қатысқан аналар, алдағы уақытта да, жиі бас қосып, туындаған мәселелерді бірге шешіп, басқалармен жаңа тәжірибе алмасатын, осындай көңілді демалыс ұйымдастыру шаралары қажет екендіктерін айтып, алғыстарын білдірді.

№12 кітапхана-бөлімшесінің оқу залында «Общение» клубының 8 наурыз мерекесіне арналған «Ұлы мәртебелі ханым» атты отырысы өткізілді.

Кітапханашы кіріспе бөлімінде аналарды мерекелерімен құттықтап, аналарға арналған өлең оқыды.

Кітапханашы әрі қарай әлемдегі ең ерекше әйелдер жөнінде, қабілетті, бірегей тұлғалар туралы әңгімеледі. Мысалы, «әлемдегі ең кәрі жүргізуші әйел», «ең тез оқитын әйел», «әлемдегі ең жіңішке бел» және т.б. Әңгіме слайд көрсетілумен жалғасты.

Келесі тапсырма слайдтағы әйгілі кино және эстрада жұлдыздарының бет-әлпетінің қөріністеріне қарап кім екенін табу керек болды.

Оқырмандарды мерекелерімен құттықтауға балалар келді. Исмагилова Зарема би билесе, ал Қызырбек Ділда «Менің әжем» атты тақпағын оқыды.

Орталық қалалық кітапханада қазақ киносының Анасы атанған, белгілі киноактриса, ҚР халық әртісі, ҚР Мемлекеттік сыйлығының лауреаты Әмина Өмірзақованың 95-жылдығына арналған «Өнерге арналған өмір» атты портрет кеші өткізілді. Шараға Байланыс және радиотехника колледжінің студенттері қатысты.

Іс-шараның мақсаты: өмірі қызықты, өлкеміздің беделді, талантты сахна саңлағы, өмір жолы өнермен өрнектелген тұлға Әмина Өмірзақованың шығармашылығымен таныстырып, жас ұрпаққа насихаттау.

Кіріспе бөлімінде тыңдаушылар Әмина Өмірзақованың есімі тек біздің елімізде ғана емес, ТМД елдерінде де кеңінен танымал, біздің өлкеміздің түлегінің өмірбаянымен, шығармашылығымен таныстырылды. Әмина Өмірзақова десе алдымен көз алдымызға А.Карповтың «Ана туралы аңызындағы» Ана бейнесі, «Тақиялы періштедегі» аңқылдаған Тана апай келері анық.

Өнердегі бүкіл ғұмырында ол кісі 50-ден астам кинофильмге түсіп, 100 ден аса рөлдерді сомдаған. Сол сияқты театр сахнасында да тамаша рөлдерімен аты тарихта өшпестей болып жазылғаны анық. Әмина Өмірзақова Ғ.Мүсірепов атындағы Қазақ мемлекеттік академиялық балалар мен жасөспірімдер театрының табалдырығын 1946 жылы аттаған екен. Өмірінің соңына дейінгі мағыналы ғұмырын аталмыш театрға арнаған.

Көпшілікке Тайлақтың анасы ретінде есте қалған Әмина Өмірзақова көзі тірі болғанда биыл 95 жасқа толар еді. Қанша қиын-қыстау заманды басынан өткерсе де, Әмина Өмірзақова – театр өнерінің шыңын бағындырған тума талант. Талант иесі осыдан сегіз жыл бұрын, 87-ге қараған жасында дүниеден озған болатын.

Осы шараға арнайы ұйымдастырылған «Сахна саңлағы» атты ашық көрмеге библиографиялық шолу жасалып, Әмина апамызға арналған «Жарқын бейне» атты деректі бейнефильм көрсетілді.

Қалалық орталық кітапханасының Қызмет көрсету бөлімінде «Бір ел - бір кітап» республикалық акция аясында «Заман және қаламгер» атты кітап көрмесінің тұсаукесері өткізілді. Тұсаукесерге Жазушылар Одағының мүшесі, филология ғылымының кандидаты, «Атилла» атты көпактылы пьесасы үшін «Атилла» медалімен марапатталған, жазушы, ақын М.Р.Сұлтанбеков пен М.Ж.Ажибаева жетекшілігімен көлік колледжінің студенттері қатысты.

Шараның мақсаты: оқырмандардың әдеби көркем тілде сөйлеп, сөздік қорларын жетілдіруде Сайын Мұратбеков шығармаларының маңызы зор екенін таныту; кітап оқуға деген қызығушылықтарын арттыру.

Шара барысында кітапхана қызметкері акцияның тарихымен таныстыра отырып, жыл сайын таңдалынған шығармаларға оқырмандардың қызығушылықтары арта түскенін айта келе, қазақ прозасының алтын қорынан саналатын санаулы саңлақтардың бірі Сайын Мұратбековтың өмірі мен шығармашылығына тоқталды.

Қазақ әдебиетін насихаттау, тарихи-мәдени және рухани мұрамызды сақтау, жастарды отаншылдыққа, өнегелілікке тәрбиелеу, оқырмандарды әдеби-көркем кітаптарды оқуға, кітапханаға тартуға бағытталған «Бір ел – бір кітап» республикалық акциясы дәстүрлі түрде өз жалғасын тауып, ауқымдала түсуде. Биыл сегізінші рет өткізіліп отырған республикалық акцияны талқылау барысында оқырмандардың ең көп дауысын жинаған атақты жазушы, Қазақстан мемлекеттік сыйлығының лауреаты Сайын Мұратбековтің «Жусан исі» және «Басында Үшқараның...» атты шығармалары жыл кітабы болып таңдалды.

Қазақ прозасындағы Бейімбет салған мектепті жаңа бір көркемдік биікке көтерген хас суреткер Сайын Мұратбековтың шығармаларының басты тақырыбы мен өзекті мәселесі – ауыл өмірі мен әлеуметтік жағдайдың өзара байланысын суреттеу арқылы кейіпкерлердің азаматтық табиғи болмысын, рухани тазалығын психологиялық этюдтермен бейнелеп өрнектеуі. Осы мақсатта, ауыл адамдарының адалдығын, ақкөңіл мінездерін, бауырмалдығын көркемдейтін шығармалары арқылы оқырмандардың жан жүрегін баурап, ықылас-құрметіне бөленген сирек дарын иесі туралы кеңінен ақпарат берілді. Сонымен қатар ҚР Ақпарат министрлігінің әлеуметтік маңызды әдебиет тізіміне енгізілген 2010 жылы «Қазақстан» баспасынан шыққан С. Мұратбековтың «Басында Үшқараның ...», «Запах полыни» атты кітаптары туралы кеңінен ақпарат берілді.

Қазақ прозасында орны айқын жазушының шығармашылығы туралы Жазушылар Одағының мүшесі, жазушы, ақын М.Р.Сұлтанбеков өмірдің болмысын шынайы бейнелейтін Сайын Мұратбековтың туындылары бүгінгі оқырмандарымен қайта жүздескеніне өз қуанышын білдіре отырып, «Жусан исі» атты шығармасына тоқталып, өзінің жазушылық ойын айтып өтті.

Қатысушыларға экраннан «Шалқар даланың Сайыны» атты бейнефильм көрсетіліп, кітап көрмесіндегі әдебиеттерге библиографиялық шолу жасалды.