Кездесу кешіне шайқасқа қатысып, батылдық пен ерліктің ерен үлгісін көрсеткен қаһарман жерлесіміз, ауған соғысының ардагері Мұсағалиев Қайрат Амантайұлы, №32 мектептің 7 сынып оқушылары қатысты.

«1979 жылы 25 желтоқсанда басталып, 110 айға созылған соғысқа Қазақстаннан 22 мыңға жуық адам қатысты. Қаза тапқандар түгелімен дерлік Қазақстанға әкелініп жерленді. Қырық жыл қырғын болса да ажалды өледі деген сөзді растамасқа болмайды. Отқа түскен боздақтардың өздері жоқ болса да, рухтары қасымызда мәңгі бірге, ұмытпайық!», - деп сөз бастаған кітапхана қызметкері Ауған соғысында құрбан болған жауынгерлерді бір минут үнсіздікпен еске алу рәсімін жариялады.

Шара барысында кітапхана қызметкері 1978 жылы Ауғанстанда сәуір айында төңкеріс болып, оның арты аяқталмас соғысқа айналғаны және бұл қасірет елдің тек өз ішінде ғана емес, оған сырт мемлекеттердің қатысуымен де ұзаққа созылғаны жайында баяндай келе, Ауған соғысының қысқаша тарихына тоқталды. «Ұлы дала өркениеті» атты деректі фильмнен көрсетілген үзінділер жас ұрпаққа Ауған соғысының қасіретін сезінуге мүмкіндік берді.

«Біздің әскерлер үшін соғыстың аяқталғанына, биылғы жылы 15 ақпанда 25 жыл толады. «Анадан ешкім батыр болып тумайды», - деп Б.Момышұлы айтқандай, халық қашанда қаһарман ұлдарын пана тұтқан. Қазақ баласы азаматтық парызын адал ақтауды ешқашан ұмытпайды», - дей отырып, сөз кезегі кештің құрметті қонағы батылдық пен ерліктің үлгісін көрсеткен Ауған соғысының ардагері, интернационалист жауынгер Қ.А.Мұсағалиевқа берілді.

Ол сұрапыл соғыстағы ауыртпалықтарды еске алып, жас ұрпақты бейбіт күннің қадірін біліп, қастерлеуге шақырды. Ардагерге оқырман қауым ойларында жүрген сұрақтарын қойып, жауаптар алды. Ардагерге қойылған сұрақтар төмендегідей болды:

• Сіздермен бірге қазақ жауынгерлері болды ма?

• Сіздің Ауғанстанға аттанғаныңызды туған-туыстарыңыз білді ме?

• Ауған жерінде болғанда ауғандықтардың қандай екенін байқадыңыз?

• Сіз Ауған соғысы туралы фильмдерді көргенде шындыққа жанасатындары бар ма?

• Сіздермен шақырылған жігіттердің қаншасы елге оралмады?

• Соғыстың алдында сіздерге жаттықтыру істерін жүргізді ме? Әлде қару беріп жібере салды ма?

• Қазіргі кезде Ұлы Отан соғысының ардагерлері аз. Сіздерге үкімет тарапынан қандай көмек көрсетіліп отыр?

• Ауғанстанда тұратын қазақтар жайлы білеміз. Соғыс кезінде қандастарымызды кездестірдіңіз бе?

• Жауынгерлік борыш барысында үй ішіңізбен жиі хабарласа алдыңыз ба?

Кездесу кешінің басты кейіпкерін Кеңес әскерінің Ауғанстан аумағынан шыққанына 25 жыл толуына байланысты мерекесімен құттықтай отырып, №32 мектеп өнерпазы Тілеуханов Тілек Құрманғазының «Балбырауын» күйін орындап берді.

Кеш соңында ауған соғысының ардагеріне естелік ретінде сыйлық тапсырыла отырып, Ауған қаһармандарын қадірлеп, құрметтеп, рух жасампаздығымен жаңартайық деп қорытындыланды.

Мақсаты: тарихты зерделеу арқылы Отанға деген сүйіспеншілікке, патриоттық сезімге тәрбиелеу, өз елін қорғауға дайындау арқылы азаматтық сезім қалыптастыру.

Естелік сағаты бір минут үнсіздікпен басталып, Қазақстан Республикасының әнұраны орындалды.

Шара басында кітапханашы үстіміздегі жылдың 15 ақпанында Кеңес әскерінің шектеулі бөлігі Ауғанстан аумағынан шығарылғанына 25 жыл толатындығын айтты.

Сонымен қатар ол қатысушыларға ҚР Президенті Н.Ә.Назарбаев өзінің жыл сайынғы Жолдауларында ҚР-дағы жастардың әскери-патриоттық тәрбиесінің рөлі, және оның тәуелсіз мемлекеттің болашағында алатын орны туралы бірнеше рет айтқандығын атап өтті.

Интернационалист жауынгерлер Ұлы Отан соғысы ардагерлерінің әскери дәстүрлері мен әскери даңқын жалғастыруға лайықты мирасқорлар болып табылады, және олар қазақстандық жастарға патриоттық тәрбие беруге әрқашан дайын. Ары қарай кітапханашы шараға қатысушыларға ауған соғысының тарихы туралы қысқаша тоқталып, ауған соғысына қатысқан семейлік интернационалист жауынгерлер туралы ақпарат берді. Әсіресе, «Қызыл Жұлдыз» орденімен қайтыс болғаннан соң марапатталған жерлесіміз, жауынгер-интернационалист Н.Р.Сырлыбаев туралы жан-жақты әңгімеледі.

Шараға қонақ ретінде Ауған аумағындағы әскери ұрыстарға қатысқан интернационалист жауынгерлер Оқапов Асан Нариманұлы, Айтпаев Савет Мұратұлы шақырылды. Олар балаларға соғыстағы біздің жауынгерлердің ерліктері туралы әңгімелеп берді. Соғыста қаза тапқан жауынгер интернационалист Н.Р.Сырлыбаевтың әкесі Сырлыбаев Рахымбек Омарханұлының өз ұлы туралы естелік әңгімесі балаларға үлкен әсер етті.

Шара барысында «Бір минут үнсіздік», атты электронды тұсаукесер және «Ауғанстан – жүректе қалған із...», «Кеңес әскерлерін ауған жерінен шығару» атты бейнероликтерден үзінділер көрсетілді.

«Ертіс толқындары» халықтық ансамблінің әншілері қатысушыларға «Ауғанстан» әнін музыкалық сый ретінде тарту етті.

Естелік сағатына балалар белсене қатысып, өздерін қызықтырған сұрақтарын қойып, жауаптарын алды. Шараға арнайы дайындалған «Ауғанстан – біздің есімізде» атты тақырыптық кітап көрмесіне библиографиялық шолу жасалды.