№12 кітапхана-бөлімшесінің балалар бөлімінде «Сенің бірінші энциклопедияларың» атты кітапханалық-библиографиялық сабақ өтті. Шараға №30 мектептің 3 «б» сынып оқушылары және сынып жетекшісі М.В.Скворцова қатысты. Мақсаты: балаларды энциклопедиялар, анықтамалықтар, сөздіктермен таныстырып, олардың құрылысы туралы және оларды қалай қолдану керек екенін түсіндіру, үйрету.

   Сабаққа арнап анықтамалықтар мен сөздіктер, энциклопедиялар қойылған кітап көрмесі ұйымдастырылды. Кітапханашы балаларға энциклопедиялардың адам өмірінде қандай маңызы бар екенін, және олар бірінші көмекші, адал достар екенін атап өтті. Сонымен қатар балаларды әр түрлі сөздіктермен, анықтамалықтармен таныстырып, оларды қолдану әдістері көрсетілді. Сабақтың аяғында балалар өз беттерімен керекті энциклопедиялар мен сөздіктерді қолданып, жұмыс жасап, дұрыс жауаптарды тауып, тапсырмалар орындады.

Балалар және жасөспірімдер кітапханасының оқу залында Рухани келісім күніне орай «Қазақстан - рухани келісім орталығы» атты хабарлама сағаты өтті.

Мәдени шараға №16 мектептің 9 сынып оқушылары және Семей көпсалалы колледжінің 1 курс студенттері мен Қайнар колледжінің студенттері қатысты.

Шараға № 16 мектептің дінтану пәнінің мұғалімі Исенғожина Назгүл Тұрсынғазықызы, Шәкәрім атындағы педагогика университетінің доценті, филология ғылымдарының кандидаты Абикенов Мұхит Төкенұлы, «Ахау-Семей» орталығының жетекшісі Күлжихан Жұматайқызы, Татар орталығының мүшесі Анар Амангелдіқызы қатысып, Қазақстанда бейбітшілік пен тұрақтылыққа Елбасының сарабдал саясаты арқасында қол жеткізіліп отырғанын атап өтті. Бұл ретте әр адамның рухани келісім туралы түсінігінің молдығы да маңызды. Елімізде түрлі ұлт өкілдері діни наным-сенімдерінің әртүрлілігіне қарамастан, тату-тәтті өмір сүріп келеді деп ой-пікірлерін білдіріп, ел бірлігінің маңызы зор екендігін атап көрсетті.

Шараның мақсаты: Қазақстанның құндылықтары - Тәуелсіздікті, бейбітшілікті, қоғамдық келісімді, отансүйгіштікті, ел жетістігінің басты кепілі ретінде этноаралық және конфессиялық толеранттылықты әрі қарай нығайту.

Колледж, мектеп оқушылары рухани келісім туралы өз ойларын айтса, № 16 мектеп оқушысы Аханғали Томирис «Рухани келісім» атты өзі шығарған өлеңін оқыды. №16 мектептің кітапханашысы Айгүл Пизулиқызы өз ойын айтып іс-шараға қатысқандарға рахметін айтты.

Шара әнұранмен басталды. Кітапханашы Қазақстан Республикасының Мемлекеттік рәміздерін экраннан слайд арқылы көрсете отырып таныстырды. Келесі кезекте №31 мектептің «Балдәурен» жазғы лагердің оқушылары «Рәміздерім – мақтанышым» атты әдеби-монтаж қойды. Кезек көңілді әнге ұласып, қыздар триосы Б. Тлеухановтың «Елім менің» әнін нақышына келтіріп орындап берді. Балаларға арналған қызықты викториналық ойындар да қызықтыра түсті. «Тосын сый» мұнда шардың ішінде сұрақ пен сыйлық болды. Дәл тауып айтса, сыйлықты ұтып алады, ал таба алмаса көрермендерге кезек берілді. «Қазақстан» жазуымен жазылған шарларды ретімен орналастыру ойыны да өте тартымды болды. Бұл ойынның тәртібінде көзі байланған оқушы шығып «Қазақстан» жазуын ретімен орналастыру керек болды. Кітапхананың оқу залында ұйымдастырылған «Мемлекеттік рәміздер» атты кітап көрмесі таныстырылды. Iс-шара Ескендір Хасанғалиевтің «Атамекен» әнімен аяқталды.

Шара барысында кітапханашы Балаларды қорғаудың халықаралық күні мейрамының шығу тарихы жайлы оқушыларға айтып өтті. Бұдан соң оқушылардың тақырып бойынша салған суреттерін тамашалап, сайыс қорытындысы бойынша №35 мектептің 3 «б» сынып оқушысы Дузбембетова Диананың суреті ең үздік деп танылып, марапатталды.

Сонымен қатар кітапхана қызметкері кітапхана жайлы ақпарат беріп, тұрақты оқырман болуға шақырды. Сайыс соңында «Біз бақытты баламыз!» атты тақырыптық сөреге библиографиялық шолу жасалды.